ਪ੍ਰਦੀਪ ਚਿੱਜੜ

ਆਕਲੈਂਡ:- 08 ਜੁਲਾਈ  2026

ਨਿਊਜ਼ੀਲੈਂਡ ਦੇ ਰਿਜ਼ਰਵ ਬੈਂਕ (RBNZ) ਨੇ ਅੱਜ ਅਧਿਕਾਰਕ ਤੌਰ ‘ਤੇ ਆਫ਼ੀਸ਼ੀਅਲ ਕੈਸ਼ ਰੇਟ (OCR) ਵਿੱਚ 25 ਬੇਸਿਸ ਪੁਆਇੰਟ (0.25%) ਦਾ ਵਾਧਾ ਕਰਕੇ ਇਸ ਨੂੰ 2.50% ਕਰ ਦਿੱਤਾ ਹੈ।
ਇਹ ਪਿਛਲੇ ਤਿੰਨ ਸਾਲਾਂ ਵਿੱਚ ਪਹਿਲੀ ਵਾਰ ਹੈ ਕਿ OCR ਵਿੱਚ ਵਾਧਾ ਕੀਤਾ ਗਿਆ ਹੈ। ਇਸ ਫ਼ੈਸਲੇ ਦਾ ਮੁੱਖ ਉਦੇਸ਼ ਲਗਾਤਾਰ ਉੱਚੀ ਰਹਿ ਰਹੀ ਮਹਿੰਗਾਈ ਨੂੰ ਕਾਬੂ ਵਿੱਚ ਲਿਆਉਣਾ ਹੈ।
ਇਹ ਫ਼ੈਸਲਾ ਰਿਜ਼ਰਵ ਬੈਂਕ ਦੀ ਮੋਨੇਟਰੀ ਪਾਲਿਸੀ ਕਮੇਟੀ ਨੇ ਕੀਤਾ। ਬੈਂਕ ਦੇ ਅਨੁਸਾਰ ਮੱਧ-ਪੂਰਬ ਦੇ ਟਕਰਾਵਾਂ, ਤੇਲ ਦੀਆਂ ਵਧੀਆਂ ਕੀਮਤਾਂ  ਮਹਿੰਗਾਈ ਉਮੀਦ ਤੋਂ ਵੱਧ ਬਣੀ ਹੋਈ ਹੈ। ਭਾਵੇਂ OCR ਵਿੱਚ ਵਾਧਾ ਕੀਤਾ ਗਿਆ ਹੈ, ਪਰ RBNZ ਨੇ ਇਸ ਨੂੰ “ਮੌਦਰਿਕ ਪ੍ਰੋਤਸਾਹਨ ਵਿੱਚ ਕਮੀ” (Reduction in Monetary Stimulus) ਕਰਾਰ ਦਿੱਤਾ ਹੈ। ਬੈਂਕ ਨੇ ਇਹ ਵੀ ਸੰਕੇਤ ਦਿੱਤਾ ਹੈ ਕਿ ਜੇ ਮਹਿੰਗਾਈ ਕਾਬੂ ਵਿੱਚ ਨਾ ਆਈ ਤਾਂ ਇਸ ਸਾਲ ਦੇ ਅੰਤ ਤੱਕ ਹੋਰ ਵਿਆਜ ਦਰਾਂ ਵਿੱਚ ਵਾਧਾ ਕੀਤਾ ਜਾ ਸਕਦਾ ਹੈ।
OCR ਨਿਊਜ਼ੀਲੈਂਡ ਵਿੱਚ ਬੈਂਕਾਂ ਦੀਆਂ ਵਿਆਜ ਦਰਾਂ ਲਈ ਇੱਕ ਮਹੱਤਵਪੂਰਨ ਮਾਪਦੰਡ ਹੈ। ਇਸ ਵਿੱਚ ਵਾਧੇ ਦਾ ਅਸਰ ਘਰਾਂ ਦੇ ਕਰਜ਼ਿਆਂ (ਮੋਰਟਗੇਜ), ਨਿੱਜੀ ਕਰਜ਼ਿਆਂ, ਬਚਤ ਖਾਤਿਆਂ ਅਤੇ ਸਮੁੱਚੇ ਘਰੇਲੂ ਬਜਟ ‘ਤੇ ਪੈ ਸਕਦਾ ਹੈ। ਇਸ ਲਈ ਆਪਣੇ ਬੈਂਕ ਦੀਆਂ ਨਵੀਆਂ ਵਿਆਜ ਦਰਾਂ ‘ਤੇ ਨਜ਼ਰ ਰੱਖਣਾ ਮਹੱਤਵਪੂਰਨ ਹੈ।