ਪ੍ਰਦੀਪ ਚਿੱਜੜ

ਆਕਲੈਂਡ:- 24 ਜੁਲਾਈ  2026

ਸਟੂਅਰਟ ਨੈਸ਼ ਨੇ ਨਿਊਜ਼ੀਲੈਂਡ ਫਰਸਟ (NZ First) ਦੇ ਉਮੀਦਵਾਰ ਵਜੋਂ ਅਸਤੀਫਾ ਦੇ ਦਿੱਤਾ ਹੈ, ਜਿਸ ਦੀ ਪੁਸ਼ਟੀ ਪਾਰਟੀ ਆਗੂ ਵਿੰਸਟਨ ਪੀਟਰਜ਼ ਨੇ ਕੀਤੀ।
ਇਹ ਫ਼ੈਸਲਾ ਉਸ ਵਿਵਾਦ ਤੋਂ ਬਾਅਦ ਆਇਆ, ਜਦੋਂ ਨੈਸ਼ ਨੇ ਨੈਸ਼ਨਲ ਪਾਰਟੀ ਦੀ ਸੰਸਦ ਮੈਂਬਰ ਕੇਟੀ ਨਿਮਨ ਦੀ ਮਾਤਰਿਤਾ ਛੁੱਟੀ ਬਾਰੇ ਟਿੱਪਣੀ ਕੀਤੀ ਸੀ। ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ਨੇ ਉਨ੍ਹਾਂ ਦੀਆਂ ਟਿੱਪਣੀਆਂ ਨੂੰ ਲਿੰਗਭੇਦੀ ਕਰਾਰ ਦਿੰਦਿਆਂ ਸਪੱਸ਼ਟ ਕੀਤਾ ਕਿ ਨੈਸ਼ ਉਨ੍ਹਾਂ ਦੀ ਸਰਕਾਰ ਵਿੱਚ ਮੰਤਰੀ ਨਹੀਂ ਬਣਨਗੇ।
ਲਕਸਨ ਨੇ ਵੀ ਬੁੱਧਵਾਰ ਰਾਤ ਸੋਸ਼ਲ ਮੀਡੀਆ ‘ਤੇ ਲਿਖਿਆ, “ਭਾਵੇ ਖ਼ਬਰਾਂ ਸਹੀ ਹੋਣ ਜਾਂ ਨਾ ਹੋਣ, ਮੈਂ ਸਪੱਸ਼ਟ ਕਰਦਾ ਹਾਂ ਕਿ ਉਹ ਮੇਰੀ ਸਰਕਾਰ ਵਿੱਚ ਮੰਤਰੀ ਵਜੋਂ ਸੇਵਾ ਨਹੀਂ ਨਿਭਾਉਣਗੇ।”
ਬੁੱਧਵਾਰ ਨੂੰ ਸੰਸਦ ਵਿੱਚ ਨੈਸ਼ ਦੀ ਕਾਫ਼ੀ ਆਲੋਚਨਾ ਹੋਈ, ਕਿਉਂਕਿ ਉਨ੍ਹਾਂ ਨੇ ਨੈਪੀਅਰ ਤੋਂ ਨੈਸ਼ਨਲ ਪਾਰਟੀ ਦੀ ਸੰਸਦ ਮੈਂਬਰ ਕੇਟੀ ਨਿਮਨ ਨੂੰ “ਆਲਸੀ” ਕਿਹਾ ਸੀ ਅਤੇ ਦੋਸ਼ ਲਾਇਆ ਸੀ ਕਿ ਉਹ ਨੌਂ ਮਹੀਨੇ ਤੱਕ ਪੂਰੀ ਤਨਖ਼ਾਹ ‘ਤੇ ਕੰਮ ਤੋਂ ਗੈਰਹਾਜ਼ਰ ਰਹੀ।
ਹਾਲਾਂਕਿ ਹਕੀਕਤ ਇਹ ਸੀ ਕਿ ਕੇਟੀ ਨਿਮਨ ਨੇ ਬੱਚੇ ਦੇ ਜਨਮ ਤੋਂ ਬਾਅਦ ਮਾਤਰਿਤਾ ਛੁੱਟੀ ਦੇ ਤਹਿਤ ਛੇ ਮਹੀਨੇ ਲਈ ਸੰਸਦ ਤੋਂ ਛੁੱਟੀ ਲਈ ਸੀ।
ਲਕਸਨ ਨੇ ਨੈਸ਼ ਦੀਆਂ ਟਿੱਪਣੀਆਂ ਨੂੰ “ਲਿੰਗਭੇਦੀ (Sexist)” ਕਰਾਰ ਦਿੱਤਾ ਅਤੇ ਕਿਹਾ ਕਿ ਉਹ “ਮੈਨੋਸਫੇਅਰ” ਵਾਲੀ ਸੋਚ ਨੂੰ ਉਤਸ਼ਾਹਿਤ ਕਰ ਰਹੇ ਹਨ।
ਜਦੋਂ ਲਕਸਨ ਤੋਂ ਪੁੱਛਿਆ ਗਿਆ ਕਿ ਕੀ ਉਹ ਨੈਸ਼ ਨੂੰ ਆਪਣੇ ਮੰਤਰੀ ਮੰਡਲ ਵਿੱਚ ਸ਼ਾਮਲ ਕਰਨਗੇ, ਤਾਂ ਉਨ੍ਹਾਂ ਨੇ ਲੋਕਾਂ ਨੂੰ ਨੈਸ਼ਨਲ ਪਾਰਟੀ ਨੂੰ ਵੋਟ ਦੇਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਇਸ ਨਾਲ ਹੋਰ ਪਾਰਟੀਆਂ ਦੇ “ਬੇਵਕੂਫ਼ ਲੋਕਾਂ” ਤੋਂ ਬਚਿਆ ਜਾ ਸਕੇਗਾ।
ਬਾਅਦ ਵਿੱਚ ਲਕਸਨ ਨੇ ਕਿਹਾ, “ਕੁਝ ਲੋਕ ਕਹਿਣਗੇ ਕਿ ਨੈਸ਼ ਬਦਲ ਗਏ ਹਨ, ਪਰ ਮੇਰੀ ਇੱਕ ਸੰਸਦ ਮੈਂਬਰ ਦੀ ਮਾਤਰਿਤਾ ਛੁੱਟੀ ਬਾਰੇ ਕੀਤੀਆਂ ਟਿੱਪਣੀਆਂ ਤੋਂ ਬਾਅਦ ਵੀ ਉਨ੍ਹਾਂ ਵੱਲੋਂ ਕੋਈ ਪਛਤਾਵਾ ਨਾ ਦਿਖਾਉਣਾ ਸਾਬਤ ਕਰਦਾ ਹੈ ਕਿ ਉਹ ਨਹੀਂ ਬਦਲੇ।”
ਦੂਜੇ ਪਾਸੇ ਨੈਸ਼ ਨੇ ਆਪਣੇ ਬਿਆਨ ਵਿੱਚ ਕਿਹਾ ਕਿ ਚੋਣ ਮੁਹਿੰਮ ਦਾ ਮੁੱਖ ਮੁੱਦਾ ਇਹ ਹੈ ਕਿ “ਨੈਪੀਅਰ ਲਈ ਕੌਣ ਹਾਜ਼ਰ ਰਹਿੰਦਾ ਹੈ ਅਤੇ ਕੰਮ ਕਰਕੇ ਦਿਖਾਉਂਦਾ ਹੈ।”
ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਕੰਮ, ਉਪਲਬਧੀਆਂ ਅਤੇ ਮਿਹਨਤ ਦੇ ਆਧਾਰ ‘ਤੇ ਲੋਕਾਂ ਦੇ ਫ਼ੈਸਲੇ ਲਈ ਤਿਆਰ ਹਨ।
ਨੈਸ਼ ਨੇ ਇਹ ਵੀ ਕਿਹਾ, “ਮੈਂ ਹਰ ਉਸ ਮਾਪੇ ਦਾ ਸਤਿਕਾਰ ਕਰਦਾ ਹਾਂ ਜੋ ਨਵਜੰਮੇ ਬੱਚੇ ਦੀ ਦੇਖਭਾਲ ਦੇ ਨਾਲ-ਨਾਲ ਆਪਣੀ ਨੌਕਰੀ ਵੀ ਨਿਭਾ ਰਿਹਾ ਹੈ। ਇਸ ਬਾਰੇ ਮੇਰੀ ਕੋਈ ਵੱਖਰੀ ਰਾਏ ਨਹੀਂ ਸੀ।”
ਉਨ੍ਹਾਂ ਨੇ ਕਿਹਾ ਕਿ ਉਹ ਅਜਿਹੀ ਸਰਕਾਰ ਦਾ ਹਿੱਸਾ ਰਹੇ ਹਨ ਜਿਸ ਨੇ ਤਨਖ਼ਾਹ ਸਮੇਤ ਮਾਤਾ-ਪਿਤਾ ਛੁੱਟੀ (Paid Parental Leave) ਦੀ ਮਿਆਦ ਵਧਾਈ ਸੀ, ਜਿਸ ਦਾ ਨੈਸ਼ਨਲ ਪਾਰਟੀ ਨੇ ਦੋ ਵਾਰ ਵਿਰੋਧ ਕੀਤਾ ਸੀ।