ਫੁਕੇਟ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਉਡਾਣ ਨਾਲ ਜੁੜੇ ਗੰਭੀਰ ਮਾਮਲੇ ਵਿੱਚ ਨਵਾਂ ਖੁਲਾਸਾ

ਫੁਕੇਟ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਫਲਾਈਟ ਵਿੱਚ 4 ਅਗਸਤ 2026 ਨੂੰ ਭਿਆਨਕ ਝਟਕੇ (Severe Turbulence) ਦੌਰਾਨ ਜਹਾਜ਼ ਅਚਾਨਕ ਕਰੀਬ 300 ਫੁੱਟ ਹੇਠਾਂ ਡਿੱਗ ਗਿਆ ਸੀ। ਇਸ ਘਟਨਾ ਵਿੱਚ ਕਈ ਯਾਤਰੀਆਂ ਅਤੇ ਚਾਲਕ ਦਲ ਦੇ ਮੈਂਬਰਾਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਸਾਹਮਣੇ ਆਈ ਸੀ।
ਹੁਣ ਸੂਤਰਾਂ ਦੇ ਹਵਾਲੇ ਨਾਲ ਸਾਹਮਣੇ ਆਇਆ ਹੈ ਕਿ ਘਟਨਾ ਤੋਂ ਬਾਅਦ ਕੀਤੇ ਗਏ ਡਰੱਗ ਟੈਸਟ ਵਿੱਚ ਫਲਾਈਟ ਦੇ ਕੈਪਟਨ ਦੀ ਰਿਪੋਰਟ ਮਾਰਿਜੁਆਨਾ (ਕੈਨਾਬਿਸ) ਅਤੇ ਹੋਰ ਮਨੋ-ਪ੍ਰਭਾਵੀ ਪਦਾਰਥ ਲਈ ਪਾਜ਼ੀਟਿਵ ਆਈ ਹੈ। ਪੁਸ਼ਟੀ ਲਈ ਕੀਤੇ ਗਏ ਅਗਲੇ ਟੈਸਟਾਂ ਵਿੱਚ ਵੀ ਇਹ ਨਤੀਜਾ ਪਾਜ਼ੀਟਿਵ ਰਹਿਣ ਦੀ ਗੱਲ ਕਹੀ ਜਾ ਰਹੀ ਹੈ।
ਜਾਂਚ ਪੂਰੀ ਹੋਣ ਤੱਕ ਕੈਪਟਨ ਦਾ ਨਾਂ ਅਧਿਕਾਰੀਆਂ ਵੱਲੋਂ ਜਨਤਕ ਨਹੀਂ ਕੀਤਾ ਗਿਆ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ DGCA ਅਤੇ Aircraft Accident Investigation Bureau (AAIB) ਵੱਲੋਂ ਦੋਵੇਂ ਪਾਇਲਟਾਂ ਨੂੰ ਫਿਲਹਾਲ  ਡਿਊਟੀ ਤੋਂ ਹਟਾ ਦਿੱਤਾ ਗਿਆ ਹੈ।
ਘਟਨਾ ਤੋਂ ਬਾਅਦ ਭਾਰਤ ਦੇ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਏਅਰ ਇੰਡੀਆ ਦੇ CEO ਕੈਂਪਬੈਲ ਵਿਲਸਨ ਨੂੰ ਵੀ ਤਲਬ ਕਰਕੇ ਜਹਾਜ਼ਾਂ ਦੀ ਸੁਰੱਖਿਆ ਅਤੇ ਇਸ ਗੰਭੀਰ ਘਟਨਾ ਨਾਲ ਨਜਿੱਠਣ ਸਬੰਧੀ ਪ੍ਰਬੰਧਾਂ ਬਾਰੇ ਜਵਾਬ ਮੰਗਿਆ ਹੈ।
ਅਧਿਕਾਰੀਆਂ ਵੱਲੋਂ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ DGCA ਵੱਲੋਂ ਸੰਭਾਵਿਤ ਕਾਰਵਾਈ ਅਤੇ ਰਸਮੀ ਜਾਂਚ ਰਿਪੋਰਟ ਸਾਹਮਣੇ ਆਉਣ ਦੀ ਉਮੀਦ ਹੈ।