ਪ੍ਰਦੀਪ ਚਿੱਜੜ
ਆਕਲੈਂਡ:- 13 ਅਗਸਤ 2026

ਉੱਤਰੀ ਆਕਲੈਂਡ ਦੀ ਸਿਹਤ ਪ੍ਰਣਾਲੀ ’ਤੇ ਸਰਦੀਆਂ ਦੌਰਾਨ ਮਰੀਜ਼ਾਂ ਦਾ ਭਾਰੀ ਬੋਝ ਪੈਣ ਕਾਰਨ ਨੌਰਥ ਸ਼ੋਰ ਹਸਪਤਾਲ ਵਿੱਚ ਥਾਂ ਦੀ ਕਮੀ ਪੈਦਾ ਹੋ ਗਈ ਹੈ। ਹਾਲਾਤ ਇੰਨੇ ਗੰਭੀਰ ਹਨ ਕਿ ਕੁਝ ਐਂਬੂਲੈਂਸ ਮਰੀਜ਼ਾਂ ਨੂੰ ਇਲਾਜ ਲਈ ਨੌਰਥ ਸ਼ੋਰ ਦੀ ਬਜਾਏ   Whāngarei    ਹਸਪਤਾਲ ਲਿਜਾਇਆ ਜਾ ਰਿਹਾ ਹੈ।
ਇਹ ਕਦਮ ਉਸ ਸਮੇਂ ਚੁੱਕਿਆ ਜਾ ਰਿਹਾ ਹੈ ਜਦੋਂ Whāngarei   ਹਸਪਤਾਲ ਖੁਦ ਵੀ ਇਸ ਸਰਦੀ ਮਰੀਜ਼ਾਂ ਦੀ ਬੇਹੱਦ ਵੱਧ ਗਿਣਤੀ ਨਾਲ ਜੂਝ ਰਿਹਾ ਹੈ। ਜਾਣਕਾਰੀ ਮੁਤਾਬਕ ਮੰਗਲਵਾਰ ਰਾਤ ਵੀ ਐਂਬੂਲੈਂਸਾਂ ਨੂੰ Whāngarei ਵੱਲ ਮੋੜਿਆ ਗਿਆ, ਜਦਕਿ ਉਸੇ ਸਮੇਂ ਉੱਥੇ ਐਮਰਜੈਂਸੀ ਵਿਭਾਗ ’ਤੇ ਵੀ ਭਾਰੀ ਦਬਾਅ ਸੀ। ਪਿਛਲੇ ਹਫ਼ਤੇ ਵੀ ਅਜਿਹੀਆਂ ਡਾਇਵਰਸ਼ਨਾਂ ਹੋਈਆਂ ਸਨ।
ਵੇਲਸਫੋਰਡ ਵਿੱਚ Coast to Coast Healthcare Group ਦੇ ਜੀਪੀ ਟਿਮ ਮੈਲੋਏ ਨੂੰ ਪਿਛਲੇ ਹਫ਼ਤੇ St John Ambulance ਵੱਲੋਂ ਪੱਤਰ ਮਿਲਿਆ, ਜਿਸ ਵਿੱਚ ਦੱਸਿਆ ਗਿਆ ਕਿ ਰੋਡਨੀ ਜ਼ਿਲ੍ਹੇ ਦੇ ਉੱਤਰੀ ਇਲਾਕਿਆਂ ਤੋਂ ਐਮਰਜੈਂਸੀ ਵਿਭਾਗ ਦੀ ਲੋੜ ਵਾਲੇ ਮਰੀਜ਼ਾਂ ਨੂੰ     Whāngarei   ਹਸਪਤਾਲ ਲਿਜਾਇਆ ਜਾਵੇਗਾ। ਇਹ ਮਰੀਜ਼ ਆਮ ਤੌਰ ’ਤੇ ਨੌਰਥ ਸ਼ੋਰ ਹਸਪਤਾਲ ਜਾਂਦੇ ਸਨ।
ਮੈਲੋਏ ਮੁਤਾਬਕ ਇਸ ਦਾ ਕਾਰਨ ਨੌਰਥ ਸ਼ੋਰ ਹਸਪਤਾਲ ’ਤੇ “ਬੇਹੱਦ ਵੱਡੀ ਮੰਗ” ਹੈ। ਉਨ੍ਹਾਂ ਕਿਹਾ ਕਿ ਇਹ ਉਨ੍ਹਾਂ ਦੀ ਪ੍ਰੈਕਟਿਸ ਨੂੰ ਮਿਲਿਆ ਇਸ ਤਰ੍ਹਾਂ ਦਾ ਪਹਿਲਾ ਪੱਤਰ ਸੀ।
ਹੈਲਥ ਨਿਊਜ਼ੀਲੈਂਡ ਦੇ ਡਾਇਰੈਕਟਰ ਆਫ਼ ਆਪਰੇਸ਼ਨਜ਼ ਬ੍ਰੈਡ ਹੀਲੀ ਨੇ ਕਿਹਾ ਕਿ ਅਸਲ ਵਿੱਚ  Whāngarei    ਵੱਲ ਮੋੜੀਆਂ ਜਾਣ ਵਾਲੀਆਂ ਐਂਬੂਲੈਂਸਾਂ ਦੀ ਗਿਣਤੀ “ਬਹੁਤ ਘੱਟ” ਹੈ। ਉਨ੍ਹਾਂ ਮੁਤਾਬਕ ਮਰੀਜ਼ਾਂ ਨੂੰ ਜਲਦ ਤੋਂ ਜਲਦ ਇਲਾਜ ਮੁਹੱਈਆ ਕਰਵਾਉਣ ਲਈ ਕਈ ਵਾਰ ਅਜਿਹੀ ਵਿਵਸਥਾ ਕੀਤੀ ਜਾਂਦੀ ਹੈ। ਕੁਝ ਥਾਵਾਂ ਤੋਂ ਯਾਤਰਾ ਦੇ ਸਮੇਂ ਦੇ ਹਿਸਾਬ ਨਾਲ  Whāngarei    ਹਸਪਤਾਲ ਨੌਰਥ ਸ਼ੋਰ ਨਾਲੋਂ ਨੇੜੇ ਵੀ ਪੈਂਦਾ ਹੈ।
ਪਿਛਲੇ 37 ਸਾਲਾਂ  ਸਰਦੀ ਦਾ ਰੀਕੋਡ ਟੁੱਟਿਆ ।
ਜੀਪੀ ਟਿਮ ਮੈਲੋਏ ਨੇ ਕਿਹਾ ਕਿ ਇਹ ਸਰਦੀ ਉਨ੍ਹਾਂ ਵੱਲੋਂ ਪਿਛਲੇ 37 ਸਾਲਾਂ ਵਿੱਚ ਦੇਖੀ ਸਭ ਤੋਂ ਰੁੱਝੀ ਹੋਈ ਸਰਦੀ ਹੈ। Coast to Coast ਦੀ Urgent Care Clinic ਵਿੱਚ ਮਰੀਜ਼ਾਂ ਨੂੰ ਕਈ ਵਾਰ ਪੰਜ ਘੰਟਿਆਂ ਤੱਕ ਉਡੀਕ ਕਰਨੀ ਪਈ।
ਹਾਲਾਤ ਇੰਨੇ ਗੰਭੀਰ ਰਹੇ ਕਿ ਸਟਾਫ਼ ਨੂੰ ਆਪਣੇ ਛੁੱਟੀ ਵਾਲੇ ਦਿਨ ਵੀ ਕੰਮ ’ਤੇ ਬੁਲਾਉਣਾ ਪਿਆ।ਸਿਹਤ ਪ੍ਰਣਾਲੀ ’ਤੇ ਵਧਦਾ ਬੋਝ ਹੁਣ ਗੰਭੀਰ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ, ਜਿੱਥੇ ਹਸਪਤਾਲਾਂ ਦੀ ਸਮਰੱਥਾ, ਐਂਬੂਲੈਂਸ ਸੇਵਾਵਾਂ ਅਤੇ ਐਮਰਜੈਂਸੀ ਵਿਭਾਗਾਂ ’ਤੇ ਇੱਕੋ ਸਮੇਂ ਭਾਰੀ ਦਬਾਅ ਪੈ ਰਿਹਾ ਹੈ।