ਪ੍ਰਦੀਪ ਚਿੱਜੜ

ਆਕਲੈਂਡ 15 ਅਕਤੂਬਰ 2025

ਨਿਯਮ ਮੰਤਰੀ ਡੇਵਿਡ ਸੇਮੂਰ (Minister for Regulation David Seymour) — ਨਿਊਜ਼ੀਲੈਂਡ ਸਰਕਾਰ ਦੇ ਕੈਬਿਨੇਟ ਮੈਂਬਰ ਹਨ, ਜੋ ਦੇਸ਼ ਵਿੱਚ ਬਣੇ ਹੋਏ ਨਿਯਮਾਂ ਅਤੇ ਕਾਨੂੰਨਾਂ ਦੀ ਸਮੀਖਿਆ, ਸੁਧਾਰ ਅਤੇ ਘਟਾਅ ਲਈ ਜ਼ਿੰਮੇਵਾਰ ਹਨ।

ਉਨ੍ਹਾਂ ਦਾ ਮੁੱਖ ਮਕਸਦ ਹੈ ਕਿ ਬੇਲੋੜੇ, ਪੁਰਾਣੇ ਅਤੇ ਉਲਝਣ ਵਾਲੇ ਨਿਯਮਾਂ ਨੂੰ ਦੂਰ ਕੀਤਾ ਜਾਵੇ, ਤਾਂ ਜੋ ਕਾਰੋਬਾਰੀਆਂ, ਸੰਗਠਨਾਂ ਅਤੇ ਆਮ ਨਾਗਰਿਕਾਂ ਨੂੰ ਕੰਮ ਕਰਨ ਵਿੱਚ ਆਸਾਨੀ ਹੋਵੇ।
ਨਿਯਮ ਮੰਤਰੀ ਡੇਵਿਡ ਸੇਮੂਰ ਨੇ ਨਿਊਜ਼ੀਲੈਂਡ ਦੀ 15.7 ਬਿਲੀਅਨ ਡਾਲਰ ਦੀ ਹੋਸਪਿਟਾਲਿਟੀ ਇੰਡਸਟਰੀ ਦਾ ਖੇਤਰ-ਵਿਆਪੀ ਸਮੀਖਿਆ (sector-wide review) ਸ਼ੁਰੂ ਕੀਤੀ ਹੈ। ਉਨ੍ਹਾਂ ਨੇ ਵਾਅਦਾ ਕੀਤਾ ਹੈ ਕਿ ਉਹ “ਰੇਡ ਟੇਪ ਅਤੇ ਬੇਵਕੂਫ਼ੀ ਭਰੇ ਨਿਯਮਾਂ” ਨੂੰ ਦੂਰ ਕਰਨਗੇ — ਜਿਹੜੇ ਉਨ੍ਹਾਂ ਦੇ ਮੁਤਾਬਕ ਕਾਰੋਬਾਰ ਦੀ ਵਾਧੇ ਨੂੰ ਰੋਕ ਰਹੇ ਹਨ ਅਤੇ ਓਪਰੇਟਰਾਂ ਨੂੰ ਪਰੇਸ਼ਾਨ ਕਰ ਰਹੇ ਹਨ।

ਇਹ ਸਮੀਖਿਆ ਟੂਰਿਜ਼ਮ ਅਤੇ ਹੋਸਪਿਟਾਲਿਟੀ ਮੰਤਰੀ ਲੂਈਜ਼ ਅਪਸਟਨ ਦੇ ਨਾਲ ਮਿਲ ਕੇ ਐਲਾਨੀ ਗਈ ਹੈ ਅਤੇ ਇਸ ਦੀ ਅਗਵਾਈ ਮਿਨਿਸਟਰੀ ਫਾਰ ਰੈਗੂਲੇਸ਼ਨ ਵੱਲੋਂ ਕੀਤੀ ਜਾਵੇਗੀ। ਸਮੀਖਿਆ ਨੂੰ ਪੂਰਾ ਕਰਨ ਲਈ ਲਗਭਗ ਛੇ ਮਹੀਨੇ ਲੱਗਣ ਦੀ ਉਮੀਦ ਹੈ।
ਇਸ ਵਿੱਚ ਉਹ ਸਾਰੇ ਨਿਯਮਾਂ ਦੀ ਜਾਂਚ ਕੀਤੀ ਜਾਵੇਗੀ ਜੋ ਰੈਸਟੋਰੈਂਟਾਂ, ਬਾਰਾਂ, ਕੈਫੇਆਂ, ਫੂਡ ਟਰੱਕਾਂ, ਕੇਟਰਿੰਗ ਸੇਵਾਵਾਂ, ਹੋਟਲਾਂ ਅਤੇ ਫੂਡ ਸਟਾਲਾਂ ’ਤੇ ਪ੍ਰਭਾਵ ਪਾਉਂਦੇ ਹਨ — ਪਰ ਜੂਆ (gambling) ਸੰਬੰਧੀ ਨਿਯਮਾਂ ਨੂੰ ਇਸ ਸਮੀਖਿਆ ਤੋਂ ਬਾਹਰ ਰੱਖਿਆ ਗਿਆ ਹੈ।
ਸੇਮੂਰ ਨੇ ਕਿਹਾ ਕਿ ਇਹ ਖੇਤਰ ਕੋਵਿਡ ਦੌਰਾਨ ਬਹੁਤ ਪ੍ਰਭਾਵਿਤ ਹੋਇਆ ਸੀ, ਅਤੇ ਹੁਣ ਇਹ ਅਸੰਗਤ, ਪੁਰਾਣੇ ਜਾਂ ਇੱਕ-ਦੂਜੇ ਨਾਲ ਟਕਰਾਓ ਵਾਲੇ ਨਿਯਮਾਂ ਕਾਰਨ ਪੀੜਤ ਹੈ — ਜਿਹੜੇ ਕਾਰੋਬਾਰੀਆਂ ਲਈ ਮਹਿੰਗੇ ਅਤੇ ਗੁੰਝਲਦਾਰ ਸਾਬਤ ਹੋ ਰਿਹੇ ਹਨ।