ਪ੍ਰਦੀਪ ਚਿੱਜੜ

ਆਕਲੈਂਡ:-14 ਜੁਲਾਈ 2026

ਇਸ ਸਾਲ ਦੀ ਚੋਣ ਵਿੱਚ ACT ਪਾਰਟੀ ਵੱਲੋਂ ਚੋਣ ਲੜਣਗੇ ਪੌਲ ਹੈਨਰੀ
ਨਿਊਜ਼ੀਲੈਂਡ ਦੇ ਮਸ਼ਹੂਰ ਟੈਲੀਵਿਜ਼ਨ ਅਤੇ ਰੇਡੀਓ ਪ੍ਰਸਾਰਕ  ਇਸ ਸਾਲ ਹੋਣ ਵਾਲੀਆਂ ਆਮ ਚੋਣਾਂ ਵਿੱਚ ACT ਪਾਰਟੀ ਦੇ ਉਮੀਦਵਾਰ ਵਜੋਂ ਚੋਣ ਲੜਣਗੇ। ਇਸ ਦਾ ਐਲਾਨ ਪਾਰਟੀ ਦੇ ਆਗੂ ਡੇਵਿਡ ਸੀਮੋਰ ਨੇ ਅੱਜ ਸਵੇਰੇ ਆਕਲੈਂਡ ਵਿੱਚ ਕੀਤਾ।
ਪੌਲ ਹੈਨਰੀ ਨਿਊਜ਼ੀਲੈਂਡ ਦੇ ਸਭ ਤੋਂ ਜਾਣੇ-ਪਛਾਣੇ ਮੀਡੀਆ ਚਿਹਰਿਆਂ ਵਿੱਚੋਂ ਇੱਕ ਹਨ। ਉਹ ਆਪਣੇ ਲੰਬੇ ਟੈਲੀਵਿਜ਼ਨ ਅਤੇ ਰੇਡੀਓ ਕਰੀਅਰ ਅਤੇ ਬੇਬਾਕ, ਤਿੱਖੇ ਅਤੇ ਕਈ ਵਾਰ ਵਿਵਾਦਿਤ ਇੰਟਰਵਿਊ ਅੰਦਾਜ਼ ਲਈ ਮਸ਼ਹੂਰ ਹਨ।
ਇਸ ਤੋਂ ਪਹਿਲਾਂ ਉਹ 1999 ਵਿੱਚ ਨੈਸ਼ਨਲ ਪਾਰਟੀ ਵੱਲੋਂ ਵਾਇਰਾਰਾਪਾ ਹਲਕੇ ਤੋਂ ਚੋਣ ਲੜ ਚੁੱਕੇ ਹਨ, ਪਰ ਉਸ ਵੇਲੇ ਲੇਬਰ ਪਾਰਟੀ ਦੀ ਜਾਰਜੀਨਾ ਬੇਅਰ ਤੋਂ ਹਾਰ ਗਏ ਸਨ।ਪੌਲ ਹੈਨਰੀ ਕੌਣ ਹਨ?
ਪੌਲ ਹੈਨਰੀ (ਜਨਮ 4 ਅਗਸਤ 1960) ਨਿਊਜ਼ੀਲੈਂਡ ਦੇ ਪ੍ਰਸਿੱਧ ਰੇਡੀਓ ਅਤੇ ਟੈਲੀਵਿਜ਼ਨ ਪ੍ਰਸਤੁਤਕਾਰ ਹਨ। ਉਹ The Paul Henry Show ਦੇ ਹੋਸਟ ਵਜੋਂ ਕਾਫ਼ੀ ਮਸ਼ਹੂਰ ਹੋਏ। 2015 ਵਿੱਚ ਉਨ੍ਹਾਂ ਨੇ TV3, RadioLive ਅਤੇ ਆਨਲਾਈਨ ਪਲੇਟਫਾਰਮ ‘ਤੇ ਪ੍ਰਸਾਰਿਤ ਹੋਣ ਵਾਲੇ ਤਿੰਨ ਘੰਟਿਆਂ ਦੇ ਸਵੇਰ  ਵਾਲੇ ਪ੍ਰੋਗਰਾਮ Paul Henry ਦੀ ਮੇਜ਼ਬਾਨੀ ਸ਼ੁਰੂ ਕੀਤੀ,
ਜਿਸ ਨੂੰ ਸ਼ੁਰੂਆਤੀ ਦੌਰ ਵਿੱਚ ਚੰਗੀ ਦਰਸ਼ਕ ਗਿਣਤੀ ਮਿਲੀ।
2012 ਵਿੱਚ ਉਹ ਆਸਟ੍ਰੇਲੀਆ ਦੇ ਟੀਵੀ ਪ੍ਰੋਗਰਾਮ Breakfast ਦੇ ਸਹਿ-ਮੇਜ਼ਬਾਨ ਵੀ ਰਹੇ, ਹਾਲਾਂਕਿ ਘੱਟ ਦਰਸ਼ਕ ਗਿਣਤੀ ਕਾਰਨ ਇਹ ਪ੍ਰੋਗਰਾਮ ਉਸੇ ਸਾਲ ਬੰਦ ਹੋ ਗਿਆ।
ਉਹ The Traitors NZ ਦੇ ਪਹਿਲੇ ਅਤੇ ਦੂਜੇ ਸੀਜ਼ਨ ਦੇ ਹੋਸਟ ਰਹੇ ਹਨ। 2024 ਵਿੱਚ ਉਨ੍ਹਾਂ ਨੂੰ ਪਹਿਲੇ ਸੀਜ਼ਨ ਲਈ ਨਿਊਯਾਰਕ ਫੈਸਟੀਵਲਜ਼ ਵਿੱਚ ਸਰਵੋਤਮ ਹੋਸਟ ਦਾ ਕਾਂਸੀ (Bronze) ਐਵਾਰਡ ਮਿਲਿਆ। ਇਸ ਸਮੇਂ ਉਹ The Chase New Zealand ਦੇ ਹੋਸਟ ਹਨ। ਪਿਛਲੇ ਸਾਲ ਉਨ੍ਹਾਂ ਨੂੰ TVNZ ਦੇ ਬੋਰਡ ਦਾ ਮੈਂਬਰ ਨਿਯੁਕਤ ਕੀਤਾ ਗਿਆ ਸੀ। ਪਰ ਉਨ੍ਹਾਂ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ACT ਪਾਰਟੀ ਵੱਲੋਂ ਚੋਣ ਲੜਨ ਦੇ ਫ਼ੈਸਲੇ ਤੋਂ ਬਾਅਦ ਉਨ੍ਹਾਂ ਨੇ ਅੱਜ ਸਵੇਰੇ ਹੀ ਇਸ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ, ਕਿਉਂਕਿ ਹੁਣ ਇਸ ਪਦ ‘ਤੇ ਬਣੇ ਰਹਿਣਾ ਉਨ੍ਹਾਂ ਲਈ ਉਚਿਤ ਨਹੀਂ ਸੀ।