ਪ੍ਰਦੀਪ ਚਿੱਜੜ

ਆਕਲੈਂਡ:- 31 ਅਗਸਤ  2026

ਆਕਲੈਂਡ ਵਿੱਚ ਪੁਲਿਸ ਨੇ ਇੱਕ ਨੇਲ ਸੈਲੂਨ ’ਤੇ ਛਾਪਾ ਮਾਰਿਆ ਹੈ। ਇਹ ਕਾਰਵਾਈ ਇੱਕ ਲੰਬੀ ਅਤੇ ਗੁਪਤ ਜਾਂਚ ਦਾ ਹਿੱਸਾ ਸੀ, ਜਿਸ ਰਾਹੀਂ ਪੁਲਿਸ ਨੇ ਦੇਸ਼ ਦੇ ਵੱਡੇ ਕਥਿਤ ਵਪਾਰਕ ਕੈਨਾਬਿਸ ਗਿਰੋਹਾਂ ਵਿੱਚੋਂ ਇੱਕ ਨੂੰ ਨਿਸ਼ਾਨਾ ਬਣਾਇਆ ਹੈ।
ਨਿਊਜ਼ੀਲੈਂਡ ਪੁਲਿਸ ਮੁਤਾਬਕ Operation Blackout ਤਹਿਤ ਆਕਲੈਂਡ ਦੇ Flat Bush, Howick, Sylvia Park, Wiri ਅਤੇ Massey ਸਮੇਤ ਕਈ ਇਲਾਕਿਆਂ ਵਿੱਚ 19 ਸਰਚ ਵਾਰੰਟ ਲਾਗੂ ਕੀਤੇ ਗਏ। ਇਸ ਕਾਰਵਾਈ ਵਿੱਚ 12 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
ਪੁਲਿਸ ਦਾ ਦੋਸ਼ ਹੈ ਕਿ ਇਹ ਗਿਰੋਹ ਆਕਲੈਂਡ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ ਕੈਨਾਬਿਸ ਉਗਾਉਣ ਵਾਲੇ ਘਰਾਂ ਲਈ ਸਾਮਾਨ ਮੁਹੱਈਆ ਕਰਦਾ, ਕੈਨਾਬਿਸ ਦੀ ਖੇਤੀ ਕਰਦਾ ਅਤੇ ਕਥਿਤ ਤੌਰ ’ਤੇ ਗੈਰਕਾਨੂੰਨੀ ਪੈਸੇ ਨੂੰ ਜਾਇਜ਼ ਕਾਰੋਬਾਰਾਂ ਰਾਹੀਂ ਘੁਮਾਉਂਦਾ ਸੀ। ਨੇਲ ਸੈਲੂਨ ਅਤੇ ਹੋਰ ਕਾਰੋਬਾਰ ਵੀ ਜਾਂਚ ਦੇ ਘੇਰੇ ਵਿੱਚ ਆਏ ਹਨ।
ਪੁਲਿਸ ਨੇ ਦੱਸਿਆ ਕਿ 10 ਮਹੀਨੇ ਚੱਲੀ ਜਾਂਚ ਦੌਰਾਨ 50 ਤੋਂ ਵੱਧ ਕਿਰਾਏ ਦੀਆਂ ਜਾਇਦਾਦਾਂ ਤੋਂ ਪੰਜ ਟਨ ਤੋਂ ਵੱਧ ਕੈਨਾਬਿਸ ਸਮੱਗਰੀ ਜ਼ਬਤ ਕੀਤੀ ਗਈ। ਤਾਜ਼ਾ ਛਾਪਿਆਂ ਦੌਰਾਨ ਲਗਭਗ 80,000 ਨਕਦ, ਲਗਭਗ 35 ਕਿਲੋਗ੍ਰਾਮ ਕੈਨਾਬਿਸ ਅਤੇ ਵੱਡੀ ਮਾਤਰਾ ਵਿੱਚ MDMA ਦੀਆਂ ਗੋਲੀਆਂ ਵੀ ਬਰਾਮਦ ਹੋਈਆਂ। Massey ਦੀ ਇੱਕ ਜਾਇਦਾਦ ਤੋਂ ਪਿਸਤੌਲ ਅਤੇ ਗੋਲੀ-ਸਿੱਕਾ ਵੀ ਮਿਲਿਆ।
ਪੁਲਿਸ ਮੁਤਾਬਕ 36 ਸਾਲਾ Flat Bush ਵਿਅਕਤੀ ਨੂੰ ਇਸ ਕਥਿਤ ਗਿਰੋਹ ਦਾ ਮੁੱਖ ਸਰਗਨਾ ਮੰਨਿਆ ਜਾ ਰਿਹਾ ਹੈ। ਉਸ ’ਤੇ ਸੰਗਠਿਤ ਅਪਰਾਧਿਕ ਗਰੁੱਪ ਵਿੱਚ ਸ਼ਾਮਲ ਹੋਣ, ਮਨੀ ਲਾਂਡਰਿੰਗ, ਕੈਨਾਬਿਸ ਦੀ ਖੇਤੀ ਲਈ ਸਾਮਾਨ ਮੁਹੱਈਆ ਕਰਵਾਉਣ ਅਤੇ ਕੈਨਾਬਿਸ ਸਪਲਾਈ ਲਈ ਰੱਖਣ ਸਮੇਤ ਛੇ ਦੋਸ਼ ਲਗਾਏ ਗਏ ਹਨ। ਉਹ 20 ਅਗਸਤ ਨੂੰ Manukau District Court ਵਿੱਚ ਪੇਸ਼ ਹੋਇਆ ਸੀ ਅਤੇ ਨਵੰਬਰ ਵਿੱਚ ਮੁੜ ਅਦਾਲਤ ਵਿੱਚ ਪੇਸ਼ ਹੋਵੇਗਾ।
ਪੁਲਿਸ ਨੇ ਇਹ ਵੀ ਦੱਸਿਆ ਕਿ ਜਾਂਚ ਦੌਰਾਨ ਕੈਨਾਬਿਸ ਦੇ ਪੌਦਿਆਂ ਦੀ ਦੇਖਭਾਲ ਕਰਨ ਵਾਲੇ 11 ਵੀਅਤਨਾਮੀ ਨਾਗਰਿਕਾਂ ਨੂੰ ਲੱਭ ਕੇ ਦੇਸ਼ ਤੋਂ ਡਿਪੋਰਟ ਕੀਤਾ ਜਾ ਚੁੱਕਾ ਹੈ, ਜਦਕਿ ਪੰਜ ਹੋਰ ਵਿਅਕਤੀ ਮੁਕੱਦਮੇ ਦੀ ਕਾਰਵਾਈ ਤੱਕ ਨਿਊਜ਼ੀਲੈਂਡ ਵਿੱਚ ਹਨ।
ਪੁਲਿਸ ਦਾ ਕਹਿਣਾ ਹੈ ਕਿ Operation Blackout ਨੇ ਆਮ ਕੈਨਾਬਿਸ ਗਰੋ ਹਾਊਸਾਂ ਤੋਂ ਅੱਗੇ ਜਾ ਕੇ ਪੂਰੇ ਨੈੱਟਵਰਕ ਦੀ ਜਾਂਚ ਕੀਤੀ ਹੈ ਅਤੇ ਇਸ ਕਾਰਵਾਈ ਨਾਲ ਆਕਲੈਂਡ ਵਿੱਚ ਚੱਲ ਰਹੇ ਇੱਕ ਵੱਡੇ ਕਥਿਤ ਅਪਰਾਧਿਕ ਨੈੱਟਵਰਕ ਨੂੰ ਝਟਕਾ ਲੱਗਾ ਹੈ।