ਪ੍ਰਦੀਪ ਚਿੱਜੜ
ਆਕਲੈਂਡ:- 29 ਅਗਸਤ 2026

ਵੈਲਿੰਗਟਨ ਦੇ ਨਵੇਂ ਪਾਣੀ ਪ੍ਰਦਾਤਾ ’ਤੇ 10 ਸਾਲ ਲਈ ਸਖ਼ਤ ਨਿਗਰਾਨੀ, $25 ਬਿਲੀਅਨ ਦੇ ਨਿਵੇਸ਼ ਦੀ ਤਿਆਰੀ
ਵੈਲਿੰਗਟਨ: ਵੈਲਿੰਗਟਨ ਵਿੱਚ ਪਾਣੀ ਅਤੇ ਗੰਦੇ ਪਾਣੀ ਦੀਆਂ ਸੇਵਾਵਾਂ ਸੰਭਾਲ ਰਹੀ Tiaki Wai ਨੂੰ ਅਗਲੇ 10 ਸਾਲਾਂ ਤੱਕ ਸਖ਼ਤ ਅਤੇ ਸੁਤੰਤਰ ਰੈਗੂਲੇਟਰੀ ਨਿਗਰਾਨੀ ਦਾ ਸਾਹਮਣਾ ਕਰਨਾ ਪਵੇਗਾ। ਸਰਕਾਰ ਨੇ Commerce Commission ਦੀ ਸਿਫ਼ਾਰਸ਼ ਮਨਜ਼ੂਰ ਕਰਦਿਆਂ ਸੰਸਥਾ ਲਈ ਨਵਾਂ performance requirement regulation ਲਾਗੂ ਕਰਨ ਦਾ ਫ਼ੈਸਲਾ ਕੀਤਾ ਹੈ।
ਇਹ ਨਿਯਮ ਨਿਊਜ਼ੀਲੈਂਡ ਵਿੱਚ ਕਿਸੇ water services provider ’ਤੇ ਪਹਿਲੀ ਵਾਰ ਇਸ ਤਰ੍ਹਾਂ ਲਾਗੂ ਕੀਤਾ ਜਾ ਰਿਹਾ ਹੈ। Tiaki Wai ਨੇ 1 ਜੁਲਾਈ ਤੋਂ ਵੈਲਿੰਗਟਨ ਦੇ ਮੈਟਰੋਪੋਲੀਟਨ ਖੇਤਰ ਵਿੱਚ ਪਾਣੀ ਸੇਵਾਵਾਂ ਦੀ ਜ਼ਿੰਮੇਵਾਰੀ ਸੰਭਾਲੀ ਹੈ ਅਤੇ ਇਹ ਲਗਭਗ 1,55,000 ਘਰਾਂ ਤੇ ਕਾਰੋਬਾਰਾਂ ਨੂੰ ਸੇਵਾਵਾਂ ਪ੍ਰਦਾਨ ਕਰਦੀ ਹੈ।
ਵੈਲਿੰਗਟਨ ਦੀ ਪੁਰਾਣੀ ਅਤੇ ਖ਼ਰਾਬ ਹੋ ਰਹੀ ਪਾਣੀ ਪ੍ਰਣਾਲੀ ਨੂੰ ਅਪਗ੍ਰੇਡ ਕਰਨ ਲਈ ਅੰਦਾਜ਼ੇ ਮੁਤਾਬਕ ਅਗਲੇ ਸਮੇਂ ਦੌਰਾਨ $25 ਬਿਲੀਅਨ ਤੱਕ ਦਾ ਨਿਵੇਸ਼ ਕਰਨ ਦੀ ਯੋਜਨਾ ਹੈ। ਨਵੀਂ ਵਿਵਸਥਾ ਤਹਿਤ Tiaki Wai ਨੂੰ ਇਸ ਨਿਵੇਸ਼ ਲਈ ਵਧੇਰੇ ਕਰਜ਼ਾ ਲੈਣ ਦੀ ਸਮਰੱਥਾ ਵੀ ਮਿਲੇਗੀ।
ਹਾਲਾਂਕਿ, ਨਵੇਂ ਪਾਣੀ ਦੇ ਬਿੱਲਾਂ ਨੂੰ ਲੈ ਕੇ ਲੋਕਾਂ ਵਿੱਚ ਨਾਰਾਜ਼ਗੀ ਵਧ ਰਹੀ ਹੈ। ਇਹ ਬਿੱਲ ਹੁਣ ਕੌਂਸਲ ਰੇਟਾਂ ਤੋਂ ਵੱਖਰੇ ਤੌਰ ’ਤੇ ਜਾਰੀ ਕੀਤੇ ਜਾ ਰਹੇ ਹਨ। ਪਿਛਲੇ ਹਫ਼ਤੇ ਸੈਂਕੜੇ ratepayers ਨੇ ਸੰਸਦ ਦੇ ਬਾਹਰ ਇਕੱਠੇ ਹੋ ਕੇ ਨਵੇਂ ਬਿੱਲਾਂ ਦਾ ਵਿਰੋਧ ਕੀਤਾ।
ਘੱਟ ਆਮਦਨ ਵਾਲੇ ਪਰਿਵਾਰਾਂ ਨਾਲ ਕੰਮ ਕਰਨ ਵਾਲੇ ਲੋਕਾਂ ਦਾ ਕਹਿਣਾ ਹੈ ਕਿ ਗੈਸ, ਖਾਣ-ਪੀਣ ਅਤੇ ਰੇਟਾਂ ਦੀਆਂ ਵਧੀਆਂ ਕੀਮਤਾਂ ਵਿਚਕਾਰ ਪਾਣੀ ਦੇ ਵੱਖਰੇ ਬਿੱਲ ਲੋਕਾਂ ’ਤੇ ਹੋਰ ਵਿੱਤੀ ਬੋਝ ਪਾ ਸਕਦੇ ਹਨ।
ਨਵੇਂ ਨਿਯਮਾਂ ਤਹਿਤ Commerce Commission ਨੂੰ Tiaki Wai ਦੀ ਕਾਰਗੁਜ਼ਾਰੀ ਲਈ ਲਾਜ਼ਮੀ ਮਾਪਦੰਡ ਤੈਅ ਕਰਨ ਦਾ ਅਧਿਕਾਰ ਹੋਵੇਗਾ। ਹਾਲਾਂਕਿ, ਕਮਿਸ਼ਨ ਪਾਣੀ ਦੀਆਂ ਕੀਮਤਾਂ ਸਿੱਧੇ ਤੌਰ ’ਤੇ ਤੈਅ ਨਹੀਂ ਕਰ ਸਕੇਗਾ।
ਕਮਿਸ਼ਨ ਪਾਣੀ ਦੇ ਬੁਨਿਆਦੀ ਢਾਂਚੇ ਦੀ ਹਾਲਤ, ਵੱਡੇ ਨਿਵੇਸ਼ੀ ਫ਼ੈਸਲਿਆਂ ਬਾਰੇ ਸਲਾਹ-ਮਸ਼ਵਰੇ ਅਤੇ ਕੁਝ ਖ਼ਾਸ ਨਿਵੇਸ਼ ਕਰਨ ਸਬੰਧੀ Tiaki Wai ’ਤੇ ਲਾਜ਼ਮੀ ਸ਼ਰਤਾਂ ਲਗਾ ਸਕਦਾ ਹੈ।
ਸਰਕਾਰ ਦਾ ਕਹਿਣਾ ਹੈ ਕਿ ਨਵਾਂ ਰੈਗੂਲੇਟਰੀ ਢਾਂਚਾ ਵੈਲਿੰਗਟਨ ਦੇ ਪੁਰਾਣੇ ਪਾਣੀ ਬੁਨਿਆਦੀ ਢਾਂਚੇ ਨੂੰ ਸੁਧਾਰਨ ਲਈ ਹੋ ਰਹੇ ਵੱਡੇ ਨਿਵੇਸ਼ ਨੂੰ ਜਵਾਬਦੇਹੀ ਅਤੇ ਸੁਤੰਤਰ ਨਿਗਰਾਨੀ ਨਾਲ ਜੋੜੇਗਾ।